صرخة تحت الركام: حكايات من غزة المحاصرة

 إحنا كغزازوة ، اللي بقهرك كلامك ما الو قيمة اصرخ وأحكي وأعمل اللي بدك

إياه لكن محدش هيسمعك،  كل الناس بتحكي بصمودنا وصبرنا وبعملو أفلام وأغاني ومسلسلات واحنا ولا الهواء.

ما هو " مش مهم " انقهر ولا موت ولا اتقطع بالنهاية بنخبط راسنا بالحيط. 

بتعرف ايش يعني رقم ولا حرف أو تكون بكيس، بني ادم 75 كيلو بكيس ها !! 

الترجمة الفعلية لكل حاجة

 " غيرك يعمل على حسابك مليون مكسب " وأنت الخسران الوحيد.

إحنا مش صامدين ولا صابرين واللي بحكي عنا هيك تجار الدم والساسة والمستغلين وكل حدا ليه مصلحه باللي صار وهيصير.

والله هالشعب مجبور على كل حاجة. 

فبالله عليكم بكفي تتكلمو بأسمنا وصبرنا وقوتنا ووجعنا لانه لكل أنسان طاقة.

 أطفالنا كسرونا وإحنا بنتفرج عليهم مش قادرين نخليهم بني ادمين آخرتهم يلعبو بخيمة والشمس حرقتهم حرق، والبرد أكل جسمهم ، ولا هم لاقين لبسة لا لصيف ولا شتاء نقدر نحطها على جسمهم ولا قادرين ناكلهم اللي نفسهم اياه. 

منشان الله حسو فينا وزي ما عملتو اللي عملتوه فينا اتذكرو الناس المرمية بالشوارع اللي مش لاقية منفذ للحياة غير طوابير الإهانة وقلة القيمة.

سنة مرت قسما بالله كل يوم الوجع بيكون أصعب من اللي قبله.