من غزّة… من وجعها وكرامتها

بِسألوني عن غزّة، وبحاول أرد، بس الكلام ما بكفّي، والوجع أكبر من كل الحروف.

غزّة؟

غزّة هي بجمال يوسف… مهما السجن طال ومهما الظلم لفّها، بتضلّ عيونها بتحكي حكاية الصبر والإيمان.

غزّة بحزن يعقوب، لمّا الفقد صار عادة، والدمعة ما بتفارق عيون الأمهات.

غزّة بغدر الإخوة، مش بس من اللي حواليها، من اللي ساكتين وواقفـين عالحياد كإنه دمها ميّ!

أنا من هناك، من بلد الشمس اللي ما بتغيب رغم دخان القصف.

من أرض فيها الطفل بينام ع صدى الطيارات، وبيصحى ع حلم مشوّه… بس بيضل يحلم!

أنا من شارع كلّ زاوية فيه إلها شهيد، وكل باب وراه أم بتسند الصبر بإيدها.

غزّة مش بس حكاية حرب…

هي صوت الأذان وقت الغارة، وهي ضحكة ولد سرق لحظة فرح من تحت الردم.

هي زفة شهيد، وصبر أهل، وعِناد ما بينكسر.

غزّة وجع… بس وجعها بيشرّف.

غزّة فقر… بس غناها بالعزّة.

غزّة جوع… بس كرمال كرامتها، ما بتمد إيدها لحدا.

أنا من هناك…

أنا من غزّة اللي ما رضيت تركع، واللي رغم الحصار، لسه بتعلّم ولادها يقولوا: المجد إِلنا، والقدس إِلنا، وما منساوم.